Tibbi yazı
Probiotik, prebiotik və sinbiotik: fərq nədir?
Bağırsağımızda trilyonlarla bakteriya yaşayır. Onların balansı pozulduqda köp, qəbizlik, ishal kimi şikayətlər yarana bilər. Belə hallarda tez-tez probiotik və ya «simbiotik» preparatlar tövsiyə olunur. Bəs onların fərqi nədir?
Sadə izah
- Probiotik — canlı faydalı bakteriyalardır.
- Prebiotik — bu bakteriyaların qidasıdır: onların yaşaması və çoxalması üçün lazım olan liflər.
- Sinbiotik — probiotik və prebiotikin birləşməsidir. (Xalq arasında «simbiotik» də deyilir.)
Dr. Həsənovanın bənzətməsi ilə: probiotik əsgərdir, prebiotik əsgərin qidası, sinbiotik isə əsgər və qida birlikdə.
Nə vaxt istifadə olunur?
Probiotiklər ən çox antibiotik müalicəsindən sonra, bəzi ishal formalarında, köp və narahatlıqda, bəzən qəbizlikdə tövsiyə olunur. Təsiri bakteriyanın konkret ştammından asılıdır. Bütün probiotiklər eyni təsir göstərmir.
Diqqət
- Hər probiotik hər insana uyğun deyil. Yanlış seçim bəzi insanlarda köpü və narahatlığı artıra bilər.
- İmmuniteti ciddi zəifləmiş xəstələr probiotikləri yalnız həkimlə məsləhətləşdikdən sonra qəbul etməlidir.
- Probiotiklər qəbizliyin və ishalın səbəbini aradan qaldırmır. Şikayət uzun sürürsə, müayinə lazımdır.
- Qatıq, kefir və canlı kultura ehtiva edən digər fermentləşdirilmiş qidalar gündəlik qidalanmanın faydalı hissəsi ola bilər.